De Schwizerischi Nazionalpark (rätoromanisch Parc Naziunal Svizzer, italiänisch Parco Nazionale Svizzero, franzöösisch Parc National Suisse) isch es Naturschutzgebiet im Kanton Graubünde, ganz im Oste vo de Schwiz. Er isch am 1. Augste 1914 als erste Nazionalpark vo de Alpe gründet worde. Er wird vonere öffentlich-rächtliche Stiftig mit Sitz z Bärn gfüert und isch sit 1979 es UNESCO-Biosfärereservat.
De Nazionalpark hät e Flächi vo 170,3 km² und isch dodemit s grösti Naturschutzgebiet vo de Schwiz. Er ligt uf em Gebiet vo de Engadiner Gmainde Zernez, S-chanf, Scuol, Valchava und Lavin. De högsti Gipfel isch im Norde de Piz Pisoc 3'174 m ü. M. und im Süde de Piz Quattervals (3'165 m), de tüüfsti Punkt isch im undere Tail vom Tal, wo uf S-charl hindere füert, uf knapp 1'400 m.3'174 m ü. M.
En knappe Drittel vom Nazionalpark isch vo Wald bedeckt, 21 % vo Alpe und Wise, de Räst bestood us vegetazionsfraie Flächene, wie Fels, Gröll, Schnee und Gwässer. En Groosstail ghört zur subalpine Vegetazionsstufe.
Es git diwärsi Stelle am Rand oder im Park, wos Infotafle för d Bsuecher hät. D Wanderwäg, wo in Park ine füered dörfed nöd verloo wärde. D Strooss vo Zernez in Ofepass ufe, goot quär dur de Nazionalpark dure und hät e paar Parkplätz för Bsuecher vom Park.
Sit em Johr 2000 laufed Bestrebige zum en nöije Nazionalpark i de Schwiz z errichte. Ganz konkret wirds im Tessin mit em Parco Nazionale del Locarnese.