S Chloster Fahr isch e Benediktinerinnechloster bi Underengstringe a de Limmat. S Gebiet vom Chloster isch e Enklave im Kanton Züri und ghört zu de politische Gmeind Würelos im Kanton Aargau. S Chloster ghört sit sinere Gründig ano 1130 zum Chloster Aisidle. De Abt vo Aisidle isch ofiziell Abt vom Chloster Fahr. D Chlosterfraue wääled aber amigs sälber e Priorin. Sit 2003 isch da d Irene Gassmann.
Em Chloster Fahr isch vo 1944 bis Endi Juli 2013 e Pürinneschuel aagschlosse gsii.
D Chlosterfraue im Chloster Fahr tüend ires Läbe noch em Evangelium und de Regle vom Heilige Benedikt gstalte. Näbed de tägliche Gebätszyte beschäftiged sich d Schwöster au mit Landwertschaft und Räbbau, aber au mit de Herstellig vo liturgische Gwänder, de Paramente.
KonventsentwickligJohr | 1873 | 2000 | 2012 |
Chlosterfraue | 7 | 33 | 24 |
As Schriftstelleri under em Name Silja Walter bekannt isch d Schwöster Maria Hedwig gsii (1919–2011).
Im Johr 2016 hät sich s Chloster idiell am Projekt Chile mit* de Fraue betailigt. D Priorin isch de Abschnitt vo Assisi bis Rom vom Pilgerwäg mitgloffe.