Die Huntington-Bibliothek isch e Bildigs- und Forschigsiirichtig in San Marino i de Nöchi vo Los Angeles, Kalifornie. D'Bibliothek hät au noo e Chunschtsammlig und einigi botanischi Gärte. Gschtiftet isch d' Huntington Bibliothek im Jahr 1924 vom Henry Huntington worde, wo en Iisebahnpionier gsi isch.
D' Bibliothek gilt als eini vo de bedütendschte private Sammlige wältwiit. Sie tuet fascht 5 Millione Manuskript, öppe 500.000 Büecher und 600.000 Fotografie umfasse. Witi Teil vo de Bibliothek sind nöd für alli zuegänglich, schtöhnd aber Schtudänte zue Forschigszwäcke offe.
Die wichtigschte Uusschtelligsstück sind e uuf Pergamänt druckti Gueteberg-Bible und s'Ellesmere Manuskript vo de Canterbury Tales, vo schoo füüfhundert jährig sind.
D' Chunschtsammlig zeigt hauptsächli änglischi und französischi Bilder vom 18. und 19. Jahrhundärt, uuserdem au noo amerikanischi vom 18., 19. und em frühe 20. Jahrhundärt. Es git au noo wächselndi Uusschtellige, wo zeigt wärdet.
D' berüehmteschte Bilder sind The Blue Boy vom Thomas Gainsborough und Pinkie vom Thomas Lawrence, wo zämme imne gliche Ruum hänged.
Uufnere Flächi vo 42,5 Hektare vo de Bibliothek gits einigi Gärte, vom Wüeschtegarte, vom Tropische-Garte bis übere zum Japanische Garte, en Zengarte und noo en Chinesische Garte.
