Her Majesty’s Theatre isch e Theater am Haymarket im West End vo London.
S Theater het e langi Dradizioon. Es isch in meerere Geböid dehäi gsi und und het e baar mol si Naame gwäggslet. Dr erst Bau het dr Archidekt John Vanbrugh baut, und es isch am 9. April 1705 as Queen’s Theatre mit dr Uffüerig von ere Pastorale vom Jakob Greber eröffnet worde. Noch dr Inthronisazioon vom Georg I. im Joor 1714 het mä si Naame aabasst und es isch s King’s Theatre gsi. Doo si die mäiste Opere vom Georg Friedrich Händel urufgfüert worde, vor allem wääred dr Zit vo dr Opereakademii 1719 bis 1728, wo au dr Giovanni Battista Bononcini und dr Attilio Ariosti für sä komponiert häi. Wo dr Johann Jacob Heidegger kaufmännische Diräkter gsi isch, het er au Maskebäll uf d Büüni brocht.
1789 isch s Geböid aabebrennt. Dr Michael Novosielski het e nöije Bau entworfe, wo im Merz 1791 iigweiht worde isch. In dere Epoche isch dr berüemti und exzentrischi franzöösischi Harfenist Nicolas Bochsa (1789–1856) dr musikalisch Diräkter gsi, und het dä Boste vo 1827 bis 1833 ghaa. 1837 het mä s Huus in Her Majesty’s Theatre umdauft und spööter wo d Herrscher wider Manne gsi si isch s wider His Majesty’s Theatre worde. Im Dezämber 1867 het s wider emol brennt und dr Charles Lee het s wider ufbaut. Es isch schliesslig abgrisse worde und dr Charles John Phipps het s Geböid entworfe, wo hüt no stoot und wo am 28. April 1897 eröffnet worde isch. Hüte cha mä dört vor allem Uffüerige vo Miusikl gsee.
Sit em 9. Oktober 1986 wird s Miusikl S Fantom vo dr Opere ufgfüert.
