Besançon [bəzɑ̃ˈsõ] (dütsch früener emol Bisanz, lat. Vesontio) isch e Stadt mit 116.952 Iiwooner (Stand 1. Januar 2013) im Oste vo Frankriich. Si isch dr Sitz vo dr Verwaltig vom Département Doubs, dr Hauptort vo dr Region Franche-Comté und dr Sitz vom Erzbistum Besançon.
Dä Iiwooner vo dr Stadt säit mä Bisontinerinne/Bisontiner (frz. Bisontines/Bisontins). D Bevölkerig vom Balligsruum Besançon zelt 244'448 Iiwooner.
Dr Ort isch in ere Schläife vom Fluss Doubs gründet worde und het wääred dr Zit vom Römische Riich under em Naame Vesontio e wichdigi Rolle gspiilt. Im Middelalter het Besançon dr Status von ere freie Stadt im Häilige Römische Riich ghaa. Wääred em 17. Joorhundert isch d Region vo dr hütige Franche-Comté hert umkämpft worde, erst 1678 isch Besançon Däil vo Frankriich worde. D Franzoose häi d Stadt denn stark befestigt. Wääred dr Industrialisierig isch Besançon e Zentrum vo dr französische Uure- und Textilindustrii worde. Bis hüte isch d Stadt in de Beriich vo dr Mikro- und Nanotechnologii wichdig.
A dr schmelschte Stell vo dr Doubs-Schlauf isch ufem Felsebärg d Zitedälle vo Besançon. Underem Bärg dure füert e Stroossedunnel und au e Dunnel vom Rhin-Rhone-Kanaal.
D Stadt wird as die grüenschti Stadt vo Frankriich bezäichnet und het en usserordentlig hoochi Lääbeskwalidäät. Dank iirem riiche historische und kulturelle Erb und iirer äinzigartige Architektur isch si sit 1986 e Stadt vo dr Kunst und Gschicht. Iiri milidäärische Befestigungsaalaage, wo uf e Vauban zrugggöön, zele sit 2008 zum UNESCO-Wältkulturerb.
Besançon hät 14 Stadttail, wo zwüsched öpe 2'200 und knap 20'000 Iiwohner händ. De iiwohnerstärchscht isch Planoise im Süde vo dr Stadt.
Beschrybig: I Gold en schwarze Adler, wo i sine beede Chlaue e roti Süüle hebed.
Städtepartner vo Besançon sind
